بابا يا تيمو يا أجمل بابا
دوسنا براحتك ما احنا غلابة
خد نياباتنا وأمنياتنا
ماهي م الأول بادية خيابة
خلينا نبات ف التكليف
شغل جميل ولذيذ وخفيف
خبرتنا تزيد ف التخريف
نتعلم تريكو وربابة
ومرتب ألوفات ألوفات
وحوافز وكشوف علاوات
ونقف بيفط ف مظاهرات
على بوابة أحلى نقابة
مرمطنا براحتك يا معلم
سوّحنا وادينا بنتعلم
وصارحنا لو يوم نتكلم
ياولادي الدنيا دي غابة
فاكرين قال نفسينا دكاترة
روس مال أهالينا المتكاترة
عيني عليهم كده من فترة
عرفوا إن الأحلام كدابة
ايه يعني سيادتك دكتور
وأنت ف وحدة غياب وحضور
لامؤاخذه تدور زي التور
ف سواقي الدنيا القلابة
اشرب واعصر ألف لمونة
خد بالك من أي صابونة
واستني ولاد المجنونة
لما يحنوا عليك بنيابة
والحلوين نزّلوا إعلان
فخم وضخم وبالألوان
واحتياجاتهم زيرو مكان
واندبي على بختي يا ندابة
بابا يا تيمو يا أجمل بابا
زيد ف عيوننا نور وطيابة
ادينا من خيرك أكتر
واحنا هنضحك وهنتغابى
No comments:
Post a Comment