جبتيني على ملا وشي
حركاتك مبتخلصشي
وعينيكي ساعات تتكلم
وشفايفك مبتنطقشي
قصدك يعني اني اسلّم
انا اسف.. مبسلمشي
كام مرة انا جيت اتكلم
وانتي بتسمعي وبتمشي
فاكراني هارجع وأحايلك
اللي انا باعني ماحايلشي
ده ابقى حمار لو جايلك
وحمار ابيض مش وحشي
وقصايدي على عربيتك
بتقولك ده مقصرشي
ده انا قلت ان انا حبيتك
وانتي كشرتي في وشي
واقف قدامك أسبل
وعيوني مبتبطلشي
انا عارف اني بمثل
لو قلت اني محبتش
بطلي علشان مش هاقدر
وانا قلبي ميستحملشي
لو شفتك قدامي اكتر
هاقعد في البيت مخرجشي
بتقولي الشعر اتغير
لا انا شاعر ومبشعرشي
انسى ده كنت بصبر
نفسي بكلام محصلشي
وغلاسة كمان يا لئيمة
راح اسيب السطر وهامشي
لا هاكمل في الترنيمة
ولاهاوصف عبطي وبكشي
No comments:
Post a Comment