محروم م الحنين

هو إنت محروم م الحنين

وللا عشان عايش أنين

قلبك صبح جامد متين

لابتطربه رنة فرّح

ولا جرح بيخليه حزين ؟!!

حكايات عينيكي

وعينيكي فيها بالألوف حكايات..

احكي و غني ع اللي عدا و فات..

وماتزعليش لو نمت ف السكة..

يكفيكي مني عشقي للبدايات

سكت الكلام

سكت الكلام ..

والصمت أعلن سطوته..

والقلب نام..

مبقتش بسمع دقته..

والحزن دام ..

ع العين تدبدب خطوته..

والحلم قام..

واخد جماله ف شنطته ..

ضحكي الهستيري

وصلة من ضحكي الهستيري

وجنون تفانيني التأثيري

دي حكايتك خلصت من غيري

قوم نام بقا وارتاح ياضميري

2010

ومعدش من 2010 ..

غير بس م الأيام دي 10..

دنيا عجيبة و فجأة بكرة ..

تلاقيه يعدي و يبقا ذكرى

صندرة

قلبك صندرة مليان كراكيب ..

و بترجع ورا و ملكش حبيب..

ضحكك كركرة.. فكرة مكررة..

دنيا ممررة و السكر محبوس ف الدولايب

طيبة عينيها

و أجمل ما فيها إنها كده بنت ناس

طيبة عينيها فجر شقشق و الرموش حراس

وبتبتسم تلمح ف وش البدر طاقة ماس

لايق عليها اسمها و سحرها إحساس